එංගලන්ත විස්සයි විස්ස සංචාරයේදී වැඩිහිටියන්ගෙන් වෙන්ව ඇඳුම් මාරු කිරීමට ඉන්දීය 15 හැවිරිදි ක්‍රීඩක වෛභව් සූර්යවංශිට ක්‍රීඩාගාරයේ වෙනම කාමරයක් වෙන්කරයි

රිතාන්‍යයේ ‘ද ගාඩියන්’ (The Guardian) පුවත්පත වාර්තා කරන අන්දමට, ළමා ආරක්ෂණ රෙගුලාසි හේතුවෙන් ඉදිරියේදී පැවැත්වෙන එංගලන්ත විස්සයි-20 සංචාරයේදී ඉන්දීය යොවුන් සුපිරි පිතිකරු වෛභව් සූර්යවංශිට (Vaibhav Sooryavanshi) ඇඳුම් මාරු කිරීම සඳහා වෙනම පහසුකම් භාවිතා කිරීමට සිදුවනු ඇත.

ලබන සිකුරාදා බෙල්ෆාස්ට්හිදී අයර්ලන්තයට එරෙහිව තරග බිමට පිවිසෙමින් ඉන්දියාව වෙනුවෙන් ජාත්‍යන්තර ක්‍රිකට් වරම් ලැබූ ලාබාලම ක්‍රීඩකයා බවට පත්වීමට නියමිත මෙම 15 හැවිරිදි ක්‍රීඩකයා, ඉන් අනතුරුව තරග පහකින් සමන්විත විස්සයි-20 තරගාවලියක් සඳහා එංගලන්තය බලා යාමට නියමිතය.

‘ද ගාඩියන්’ පුවත්පත වාර්තා කළේ ජාත්‍යන්තර ක්‍රිකට් කවුන්සිලයේ (ICC) ළමා ආරක්ෂණ නීති සහ එංගලන්ත සහ වේල්ස් ක්‍රිකට් මණ්ඩලයේ (ECB) රෙගුලාසිවලට අනුව, වයස අවුරුදු 16ට අඩු ක්‍රීඩකයින්ට වැඩිහිටි ඇඳුම් මාරු කරන කාමර භාවිතා කිරීම තහනම් කර ඇති බවයි. මේ හේතුවෙන් එංගලන්ත සංචාරයේදී සියලුම ක්‍රීඩාංගණවල සූර්යවංශි වෙනුවෙන් වෙනම පහසුකම් සලසා දෙනු ඇත.

තරග පැවැත්වෙන අවස්ථාවන්හිදී සහ කණ්ඩායම් රැස්වීම්වලදී සූර්යවංශිට ඉන්දීය ක්‍රීඩාගාරය (dressing room) තුළ රැඳී සිටීමට තවදුරටත් අවසර ලැබෙන නමුත්, මෙම සීමාව බලපාන්නේ තරගවලට පෙර සහ පසුව ක්‍රීඩකයින් ඇඳුම් මාරු කරන අවස්ථාවන්හිදී පමණක් බව එම වාර්තාවේ සඳහන් වේ.

‘ද ගාඩියන්’ පුවත්පතට අනුව, අවශ්‍ය ආරක්ෂණ පියවරයන් නිසි පරිදි ක්‍රියාත්මක කිරීම සහතික කිරීම සඳහා ECB ආයතනය, ඉන්දීය ක්‍රිකට් පාලක මණ්ඩලය (BCCI) සහ ක්‍රීඩාංගණ බලධාරීන් සමඟ සමීපව කටයුතු කරමින් සිටී. සූර්යවංශිගේ දෙමාපියන්ද මෙම සංචාරය පුරාවටම ඔහු සමඟ රැඳී සිටීමට නියමිත බව එම වාර්තාවේ වැඩිදුරටත් දැක්වේ.