තනිකඩයින්ට රොබෝ සහකරුවෙක්

චීන රොබෝ තාක්ෂණ සමාගමක් වන Ubtech, තම UWORLD සන්නාමය යටතේ නව පාරිභෝගික නිෂ්පාදන පෙළක් නිර්භීතව වෙළඳපොළට හඳුන්වා දී ඇත.

මෙය භෞතික කෘත්‍රිම බුද්ධියේ (Physical AI) වඩාත්ම ආන්දෝලනාත්මක සීමා අතික්‍රමණය කර තිබීම විශේෂය.

එනම්, මෙලෙස හඳුන්වා දෙන්නේ නිවස තුළ චිත්තවේගීය සහකාරිත්වය සඳහාම විශේෂයෙන් නිර්මාණය කරන ලද, සැබෑ මිනිස් ස්වරූපයට අතිශයින්ම සමාන, පූර්ණ ප්‍රමාණයේ හියුමනොයිඩ් රොබෝවරුන්ය.

මොවුන් සෘජුවම වැඩිහිටියන් සඳහා ම වෙන් කර ඇත.

ජූනි 30 වන දින ෂෙන්සෙන් (Shenzhen) හි පැවැත්වුණු 2026 ගෝලීය හඳුන්වාදීමේ උත්සවයේදී "ආදරය සදාකාලිකයි" (Love is eternal) යන තේමාව යටතේ මෙම UWORLD U1 මාදිලිය කරළියට පැමිණෙන ලදී.

ඊට පිරිමි සහ ගැහැණු යන මාදිලි දෙකෙන්ම සැබෑ මිනිස් ප්‍රමාණයේ, මෘදු ස්පර්ශයකින් යුත් හියුමනොයිඩ් රොබෝවරුන් ඇතුළත් වේ. මොවුන් කාර්මික වැඩ සඳහා හෝ හුදෙක් සෙල්ලම් බඩු සඳහා නිපදවූවන් නොවේ.

මොවුන්ව හඳුන්වා දී ඇත්තේ දිගුකාලීන චිත්තවේගීය බැඳීම් ඇති කර ගත හැකි, කාලයත් සමඟ පරිණාමය වන සමීප සහකරුවන් ලෙසය. මෙහි ප්‍රධානතම මාදිලි මිනිස් ප්‍රමාණයෙන් යුක්ත වේ.

පිරිමි මාදිලිය : උස සෙන්ටිමීටර 183, බර කිලෝග්‍රෑම් 42

ගැහැණු මාදිලිය : උස සෙන්ටිමීටර 168, බර කිලෝග්‍රෑම් 35.2

මිනිසෙකුට සමාන චලනයන් සඳහා මොවුන් සතුව නිදහස් සන්ධි ස්ථාන (degrees of freedom) 88ක් පවතී.

ඇස් පියසැලීම, හිස හැරවීම සහ නර්තනය පවා ඊට ඇතුළත් වේ.

වැළඳගැනීම් සහ භෞතික අන්තර්ක්‍රියා සඳහා වඩාත් සුදුසු වන පරිදි, සැබෑ සමට සමාන සිලිකොන් සමක් සහ මෘදු ස්පර්ශ මතුපිටක් මෙම රොබෝවරුන්ට ඇත.

ප්‍රචාරණය සහ හඳුන්වාදීමේ දී ඔවුන්ව විලාසිතාත්මක ඇඳුම්වලින් හැඩගන්වා ඇති අතර, පෙනුම වෙනස් කිරීමේ හැකියාව ද (විශේෂයෙන්ම ගැහැණු මාදිලි සඳහා මේකප් සහ කොණ්ඩා මෝස්තර ඇතුළුව) ලබා දී ඇත.

ඔවුන්ගේ මුහුණේ ඉරියව් ආකර්ෂණීය මිනිස් පෙනුමකට සමාන වන සේ සකසා ඇත.

මෙහි මූලික පදනම වන්නේ චිත්තවේගීය AI ආකෘතියයි (Emotional AI model).

මෙහිදී ස්වාභාවික සංවාද, සෘජු ඇස් සම්බන්ධතා (eye contact) සහ චිත්තවේගීය ප්‍රතිචාර දැක්වීම් කෙරෙහි විශේෂ අවධානයක් යොමු කර ඇත. පෞද්ගලිකත්වය සුරැකීම සඳහා දත්ත සංකේතනය (encryption) කර දේශීයව ගබඩා කරනු ලබයි.

Ubtech සමාගම කලක් තිස්සේ ප්‍රසිද්ධව සිටියේ කාර්මික සහ සේවා හියුමනොයිඩ් රොබෝවරුන් සඳහාය.

මෙම UWORLD පාරිභෝගික සන්නාමය හරහා ඔවුන් උත්සාහ කරන්නේ ගෘහස්ත වෙළඳපොළ වෙත හැරීමටය.

සමාගම මෙම U1 මාලාව හඳුන්වා දෙන්නේ චිත්තවේගීය සහකාරිත්වය, තනිකම සහ දිගුකාලීන මිනිස්-රොබෝ සහජීවනය සඳහා විසඳුමක් ලෙසය.

මීට අමතරව, මානසික සුවතා වැඩසටහන් සඳහා සහය දැක්වීම පිණිස විශේෂිත රොබෝ ඒකක පුණ්‍යායතන වෙත පරිත්‍යාග කිරීමේ සැලසුම් ද ඔවුන් සතුව ඇත.

මෙහි චීනයේ මුල් ඇණවුම් සඳහා බෙදාහැරීම් 2026 සැප්තැම්බර් මැද භාගයේදී ආරම්භ කිරීමට නියමිතය.

ජාත්‍යන්තර වෙළඳපොළට මෙය ලබා ගත හැක්කේ කවදාද යන්න තවමත් ස්ථිර නැත.

රොබෝවරුන් දැනට ප්‍රධාන වශයෙන් අලෙවි කරනු ලබන්නේ චීනය තුළ පමණි.

වේගයෙන් දියුණු වන භෞතික AI ලෝකය තුළ Ubtech සමාගම විශාල පෙරළියක් සිදු කර ඇත.