WhatsApp වෙතින් නව පහසුකමක් - දුරකථන අංකය නොපෙන්වා 'Username' මඟින් චැට් කිරීමට අවස්ථාව

WhatsApp පරිශීලකයන්ට තමන්ගේ දුරකථන අංකය අන් අයට හෙළි නොකර, ඒ වෙනුවට අනන්‍ය 'Username' (පරිශීලක නාම) හුවමාරු කරගනිමින් චැට් කිරීමේ හැකියාව ඉදිරියේදී ලැබෙනු ඇත.

ඉදිරි මාස කිහිපය ඇතුළත ලොව පුරා සිටින බිලියන තුනක WhatsApp ගිණුම් හිමියන් වෙත මෙම විශේෂාංගය ක්‍රමයෙන් හඳුන්වා දීමට නියමිතය.

ඒ අනුව ඉදිරියේදී පරිශීලකයන්ට තමන් කැමති Username එකක් ඇප් එක හරහා වෙන්කරවා ගැනීමේ හැකියාව ලැබෙන නමුත්, එය අනිවාර්ය නොවේ.

එසේම ඕනෑම අවස්ථාවක මෙම Username එක ඉවත් කිරීමට හෝ වෙනස් කිරීමට ද පරිශීලකයන්ට අවස්ථාව පවතී.

මෙම Username එකක් උපරිම වශයෙන් අකුරු/සංකේත 35 කට (35 characters) සීමා වේ.

එමෙන්ම මේ හරහා ප්‍රසිද්ධ දේශපාලනඥයන් හෝ ප්‍රසිද්ධ චරිතවල නම් වෙනත් අයට ව්‍යාජ ලෙස භාවිත කිරීමට නොහැක. නම් වෙනත් අයට භාවිත කිරීමට නොහැකි වන සේ සීමා කර ඇත.

කරදරකාරී පණිවිඩ එවන්නන්ව 'Block' කිරීමට හෝ 'Report' කිරීමට ඇති අවස්ථා මෙහිදී ද එලෙසම පවතී.

මෙම විශේෂාංගය සම්පූර්ණයෙන්ම සක්‍රිය වූ පසු, WhatsApp හරහා පුද්ගලික දුරකථන අංක ඍජුවම දර්ශනය නොවේ. කෙසේ වෙතත්, WhatsApp ගිණුමක් ආරම්භ කිරීම සඳහා දුරකථන අංකයක් තිබීම තවදුරටත් අනිවාර්ය වේ. එසේම පොදු Username නාමාවලියක් (Public directory) මෙහිදී පවත්වාගෙන යනු නොලැබේ.

මීට සමාන සේවාවක් පණිවිඩ හුවමාරු ඇප් එකක් වන 'Signal' විසින් 2024 වසරේදී හඳුන්වා දෙන ලදී.